रत्नागिरी प्रतिनिधी : रत्नागिरी-सिंधुदुर्ग-रायगड कोकण विधानपरिषद मतदारसंघ निवडणुकीसाठी राजकीय वातावरण चांगलेच तापले आहे. महायुतीकडून अखेर राष्ट्रवादी काँग्रेसचे माजी आमदार अनिकेत तटकरे यांच्या नावाची अधिकृत घोषणा करण्यात आली आहे. आज मोठ्या शक्तीप्रदर्शनासह तटकरे आपला उमेदवारी अर्ज सादर करणार असून, त्यांच्या समर्थकांनी रत्नागिरीत मोठी गर्दी केली आहे.
दुसरीकडे, महाविकास आघाडीचे (ठाकरे शिवसेना) उमेदवार बाळ माने हे देखील आज सोमवारी आपला अर्ज दाखल करणार आहेत. त्यामुळे या निवडणुकीत आता मुख्य लढत बाळ माने आणि अनिकेत तटकरे यांच्यातच होणार असल्याचे स्पष्ट झाले असून, या ‘हाय व्होल्टेज’ लढतीकडे संपूर्ण राज्याचे लक्ष लागले आहे.
महत्त्वाचे मुद्दे:
शक्तीप्रदर्शन: दोन्ही बाजूंकडून आज जोरदार शक्तीप्रदर्शन करत अर्ज भरले जाणार आहेत.
राजकीय प्रतिष्ठा: खासदार सुनील तटकरे यांनी अनिकेत तटकरेंसाठी आपली सर्व ताकद पणाला लावली आहे.
बंडखोरीचे सावट: शिवसेना शिंदे गटाच्या आमदार महेंद्र दळवी यांच्या कन्या जुईली दळवी यांनी अर्ज भरल्याने महायुतीसमोर ‘डॅमेज कंट्रोल’चे आव्हान उभे राहिले आहे.
कोकणातील या चुरशीच्या लढाईत बाजी कोण मारणार, याची उत्सुकता आता शिगेला पोहोचली आहे.
