रत्नागिरी प्रतिनिधी : रत्नागिरी एमआयडीसी परिसरातील मिरजोळे येथे एका बेदरकार बल्कर चालकाने महावितरणच्या मालमत्तेचे मोठे नुकसान केले आहे. भरधाव बल्करने रस्त्या कडेला असलेल्या सहा विद्युत खांबांना आणि ट्रान्सफॉर्मरला जोरदार धडक दिली. या अपघातात महावितरणचे सुमारे ११ लाख १७ हजार ५६२ रुपयांचे नुकसान झाले असून, अपघातानंतर चालक वाहन सोडून फरार झाला आहे.
नेमकी घटना काय?
शनिवारी सायंकाळी ५:४० वाजण्याच्या सुमारास मिरजोळे एमआयडीसीमधील ओमकार कॅश्यूकडे जाणाऱ्या रस्त्यावर हा अपघात घडला. ‘आशादीप’ संस्थेसमोरून जात असताना चालकाचे बल्करवरील नियंत्रण सुटले आणि त्याने एकामागोमाग एक सहा विद्युत खांब आणि ट्रान्सफॉर्मर डिस्ट्रीब्यूशन बॉक्सला धडक दिली. धडक इतकी भीषण होती की, विजेचे खांब आणि तारा पूर्णपणे उद्ध्वस्त झाल्या.
तपासातील महत्त्वाचे मुद्दे:
मालकी: सदर बल्कर तुषार साळवी (रा. फणसोप, रत्नागिरी) यांच्या मालकीचा असल्याचे निष्पन्न झाले आहे. ट्रान्सफॉर्मर स्ट्रक्चरसह एकूण ११.१७ लाखांचे शासकीय नुकसान झाले असून परिसरातील वीज पुरवठा खंडित झाला होता. महावितरणचे सहाय्यक अभियंता प्रफुल्ल रवींद्र साळवे यांच्या तक्रारीवरून पोलिसांनी गुन्हा दाखल केला आहे.
पोलिस कारवाई आणि कलमे
रत्नागिरी शहर पोलिसांनी फरार चालकाविरुद्ध खालील कलमान्वये गुन्हा नोंदवला आहे:
भारतीय न्याय संहिता २०२३: कलम २८१, ३२४(५)
मोटार वाहन कायदा: कलम १८४
विद्युत कायदा २००३: कलम १३९
“स्थानिक ग्राहकांच्या माहितीनंतर आम्ही तातडीने पाहणी केली असता महावितरणचे प्रचंड नुकसान झाल्याचे दिसले. शासकीय मालमत्तेच्या हानीप्रकरणी पोलिसात रीतसर तक्रार देण्यात आली आहे.”
— प्रफुल्ल साळवे, सहाय्यक अभियंता, महावितरण.
सध्या रत्नागिरी शहर पोलीस फरार चालकाचा शोध घेत असून, अधिक तपास सुरू आहे.
