रत्नागिरी प्रतिनिधी : मैत्रिणीला भेटल्याच्या कारणावरून निर्माण झालेल्या रागातून एका २९ वर्षीय तरुणाला चौघांनी मिळून बेदम मारहाण केल्याची धक्कादायक घटना रत्नागिरीतील राजीवडा पुलाखाली घडली आहे. या हल्ल्यात लोखंडी रॉडचा वापर करण्यात आला असून, शहर पोलिसांनी याप्रकरणी चौघांविरुद्ध गुन्हा दाखल केला आहे.
नेमकी घटना काय? : मिळालेल्या माहितीनुसार, फिर्यादी अरमान नझीर होडेकर (२९, रा. राजीवडा) आणि संशयित आरोपी एकमेकांच्या ओळखीचे आहेत. संशयित रमजान मिरकर याची मैत्रीण अफरिन बली (रा. जैतापूर) ही अरमानची देखील मैत्रीण आहे. काही दिवसांपूर्वी अरमान तिला भेटण्यासाठी गेला होता. त्यावेळी अफरिनने रमजानचा गॉगल, चादर आणि इतर काही सामान अरमानकडे परत देण्यासाठी सोपवले होते.
गैरसमजातून वाद आणि मारहाण : अरमान आपल्या मैत्रिणीला का भेटतो आणि ती त्याच्याशी का बोलते, असा संशय रमजानने मनात धरला होता. याच रागातून गुरुवारी (२६ मार्च) रात्री ९:३० च्या सुमारास राजीवडा पुलाखाली रमजानने अरमानला गाठले आणि वाद घालण्यास सुरुवात केली. वादाचे रूपांतर लवकरच हाणामारीत झाले.
यावेळी रमजानसोबत त्याचे इतर तीन साथीदारही तिथे पोहोचले. या सर्वांनी मिळून अरमानला अर्वाच्य भाषेत शिवीगाळ करत लाथाबुक्यांनी मारहाण केली. संताप इतका अनावर झाला की, संशयितांनी लोखंडी रॉडने अरमानवर वार करून त्याला गंभीर जखमी केले.
चौघांवर गुन्हा दाखल : अरमान होडेकर याने दिलेल्या तक्रारीवरून रत्नागिरी शहर पोलिसांनी खालील संशयितांविरुद्ध गुन्हा नोंदवला आहे:
१. रमजान नवाज मिरकर
२. साजिद बाबा मिरकर
३. अझरुद्दीन अलीमिया मुजावर
४. महम्मद बावा मिरकर (सर्व रा. राजीवडा, रत्नागिरी)
या प्रकरणाचा पुढील तपास शहर पोलीस करत असून, भरवस्तीत झालेल्या या मारहाणीमुळे परिसरात खळबळ उडाली आहे.
