मालवण प्रतिनिधी: महाराष्ट्र सागरी हद्दीत बेकायदेशीररीत्या एलईडी (LED) लाईट्सचा वापर करून मासेमारी करणाऱ्यांविरुद्ध मत्स्यव्यवसाय विभागाने आपली मोहीम तीव्र केली आहे. ३० मार्च रोजी रात्रीच्या सुमारास मालवण-देवबाग समुद्रात गस्त घालत असताना, रत्नागिरी जिल्ह्यातील ‘भुवनेश्वरी’ (IND MH 4 MM 3738) या नौकेवर धडक कारवाई करण्यात आली. ही नौका जप्त करून सध्या मालवणच्या सर्जेकोट बंदरात उभी करण्यात आली आहे.
नेमकी घटना काय? : मत्स्यव्यवसाय विभागाचे गस्ती पथक शनिवारी रात्री ९ वाजण्याच्या सुमारास देवबाग किनारपट्टीपासून साधारण ११ ते १२ सागरी मैल अंतरावर गस्त घालत होते. यावेळी रत्नागिरीतील शिरगाव येथील महेश मनोहर आयरे यांच्या मालकीची ‘भुवनेश्वरी’ नौका अनधिकृतपणे एलईडी प्रकाशझोत लावून मासेमारी करताना रंगेहात सापडली. पथकाने त्वरित कार्यवाही करत नौका ताब्यात घेतली. यावेळी नौकेवर तांडेलसह दोन खलाशी उपस्थित होते.
कठोर कायदेशीर कारवाईचे संकेत : सदर कारवाई महाराष्ट्र सागरी मासेमारी नियमन अधिनियम १९८१ (सुधारित २०२१) अंतर्गत करण्यात आली आहे. या कारवाईबाबतचा सविस्तर अहवाल सिंधुदुर्ग मत्स्यव्यवसाय सहाय्यक आयुक्त सागर कुवेसकर यांच्याकडे सादर केला जाणार आहे. सुनावणीनंतर नौका मालक आणि संबंधितांवर मोठा दंड आणि कठोर कायदेशीर कारवाई होण्याची शक्यता आहे.
“मत्स्यव्यवसाय मंत्री नितेश राणे यांच्या कडक सूचनांनुसार, अवैध मासेमारी करणाऱ्यांवर आमचा विभाग सातत्याने लक्ष ठेवून आहे. यापूर्वीही अनेक नौकांवर कारवाई करून मोठा दंड वसूल करण्यात आला असून, यापुढेही नियम मोडणाऱ्यांची गय केली जाणार नाही.”
— सागर कुवेसकर, सहाय्यक आयुक्त, मत्स्यव्यवसाय सिंधुदुर्ग.
गस्ती पथकाची कामगिरी : ही यशस्वी मोहीम परवाना अधिकारी तथा अंमलबजावणी अधिकारी, मालवण यांच्या नेतृत्वाखाली राबवण्यात आली. या कारवाईत सागरी सुरक्षा पर्यवेक्षक मायबा, परब, जाधव, जुवाटकर आणि सावजी यांनी मोलाचे सहकार्य केले.
ठळक मुद्दे:
नौकेचे नाव: भुवनेश्वरी (रत्नागिरी)
स्थळ: देवबाग-मालवण समुद्र (११-१२ सागरी मैल)
कारण: बंदी असलेल्या एलईडी लाईट्सचा वापर.
सद्यस्थिती: नौका जप्त, सर्जेकोट बंदरात अवरुद्ध.
