रत्नागिरी प्रतिनिधी : मुंबई-गोवा महामार्गाच्या चौपदरीकरणाचे काम रखडलेले असतानाच, पावसाळ्याच्या सुरुवातीलाच या मार्गावरील सुरक्षेचा प्रश्न पुन्हा एकदा ऐरणीवर आला आहे. मोसमाच्या पहिल्याच दमदार पावसामुळे संगमेश्वर बाजारपेठेपासून रत्नागिरीच्या दिशेने असलेल्या म्हाबळे परिसराजवळ महामार्गालगतची दरड खचल्याची धक्कादायक घटना घडली आहे. या घटनेमुळे महामार्गावरील प्रवाशांच्या सुरक्षेबाबत गंभीर चिंता निर्माण झाली आहे.
दरड खचल्यामुळे मोठ्या प्रमाणात माती, दगड आणि ढिगारा थेट महामार्गावर येऊन पडला आहे. यामुळे वाहनचालकांसाठी अत्यंत धोकादायक परिस्थिती निर्माण झाली असून, या महत्त्वाच्या मार्गावरील वाहतुकीला मोठा अडथळा निर्माण झाला आहे. सुदैवाने या घटनेत कोणतीही जीवितहानी झाली नसली, तरी भविष्यातील मोठा अनर्थ टाळण्यासाठी प्रशासनाने तातडीने पावले उचलणे गरजेचे बनले आहे.
विशेष चिंताजनक बाब म्हणजे, ज्या ठिकाणी ही दरड खचली आहे, त्याच्या अगदी वरच्या उंचावलेल्या भागावर स्थानिक नागरिकांची घरे आहेत. हवामान खात्याने पुढील काही दिवस कोकणात मुसळधार पावसाचा इशारा दिला असल्याने, पावसाचा जोर कायम राहिल्यास आणखी दरड कोसळण्याची भीती वर्तवली जात आहे. परिणामी, महामार्गावरील वाहतुकीसोबतच येथील स्थानिक रहिवाशांच्या सुरक्षिततेचाही गंभीर प्रश्न निर्माण झाला आहे.
दरवर्षी पावसाळ्यात मुंबई-गोवा महामार्गावर दरड कोसळणे आणि खड्डे पडणे यांसारख्या समस्यांना कोकणवासीयांना तोंड द्यावे लागते. या पार्श्वभूमीवर, राष्ट्रीय महामार्ग प्राधिकरण आणि कंत्राटदार कंपनीने तातडीने घटनास्थळाची पाहणी करून रस्त्यावरील ढिगारा हटवावा आणि दरडीच्या भागाचे मजबुतीकरण करावे, अशी मागणी स्थानिक नागरिकांकडून केली जात आहे. संभाव्य धोका लक्षात घेता प्रशासनाने २४ तास सतर्क राहून तातडीने उपाययोजना करणे गरजेचे आहे.
चौपदरीकरणाच्या ढिसाळ नियोजनामुळेच पहिल्याच पावसात डोंगर खचण्याच्या घटना घडत असल्याचा थेट आरोप आता स्थानिक आणि प्रवाशांकडून केला जात आहे. कंत्राटदार कंपन्यांनी डोंगर कटिंग करताना पुरेशी खबरदारी न घेतल्याने हा धोका वाढल्याचे बोलले जात असून, या बेजबाबदार कारभाराविरोधात नागरिकांमध्ये तीव्र संताप व्यक्त होत आहे. आता प्रशासन यावर केवळ तात्पुरती मलमपट्टी करते की कायमस्वरूपी ठोस उपाययोजना आखते, याकडे सर्वांचे लक्ष लागले आहे.
