पाडव्या दिवशीही सोने-चांदीचे दर गडगडले; 1 तोळ्याचा दर पाहून खरेदीसाठी गर्दी कराल

अमेरिकेच्या फेडरल रिझर्व्हने व्याजदर 3.5% ते 3.75% वर स्थिर ठेवल्याने आणि नरम भूमिका घेतल्याने, लवकर व्याजदर कपातीच्या आशा मावळल्या. त्यामुळे गुरुवारी (19 मार्च) MCX वर सोने आणि चांदीच्या दरात घसरण झाली. जागतिक संकेत आणि मजबूत डॉलरच्या दबावामुळे सोने-चांदीच्या दरात मोठी घसरण झाली आहे.

डॉलर मजबूत होत असल्याने, बॉण्ड यील्ड्स वाढत असल्याने आणि यूएस फेडचे ‘हायर-फॉर-लॉन्गर’ दर धोरण लागू असल्याने सोन्यावर तीव्र दबाव आहे. एका सत्रात सोन्याने 100 डॉलर आणि दोन दिवसांत जवळपास 300 डॉलरची घसरण नोंदवली आहे. कच्च्या तेलाच्या वाढत्या किमती आणि इराण-संबंधित तणावामुळे सोन्याचे सुरक्षित गुंतवणुकीचे आकर्षण कमी होत आहे. सोन्याचा भाव घसरून जवळपास एका महिन्याच्या नीचांकी पातळीवर, 4700 डॉलरच्या जवळ पोहोचला आहे. एमसीएक्सवर रेझिस्टन्स ₹1,50,000 वर आहे, तर सपोर्ट ₹1,44,000 ते ₹ 1,42,000 च्या दरम्यान आहे आणि अल्पकालीन ट्रेंड कमकुवत व अस्थिर आहे.

इंडियन बुलियन अँड ज्वेलर्स असोसिएशन (IBJA) नुसार, गुरुवारी, 19 मार्च रोजी सोन्याच्या दरात तब्बल 6990 रुपयांची घसरण झाली आहे. सकाळी सोन्याचा दर 1,54,879 रुपये प्रति 10 ग्रॅम इतका होता. दुपारी सोन्याच्या दरात आणखी घसरण झाली. या घसरणीनंतर सोन्याचा दर 1,51,637 रुपये प्रति 10 ग्रॅम इतका झाला. तर संध्याकाळी दरात आणखी घसरण झाली आणि सोने 147,889 रुपये प्रति 10 ग्रॅमवर पोहोचले. म्हणजेच 24 कॅरेट सोन्याचा दर 1.50 लाखांच्या खाली पोहोचला आहे.

सोने आणि चांदीच्या घसरणीची कारणे :  सोने आणि चांदीवरील दबावाची सर्वात मोठी कारणे म्हणजे मजबूत डॉलर आणि यूएस फेडरल रिझर्व्हची नरम भूमिका. फेडने बुधवारी व्याजदर अपरिवर्तित ठेवले. तसेच, या वर्षी व्याजदर कपातीची शक्यता मर्यादित असू शकते, असेही संकेत दिले.

जेव्हा व्याजदर जास्त राहतात, तेव्हा गुंतवणुकदारांचा सोने आणि चांदीमधील रस कमी होतो, कारण त्यातून लाभांश किंवा व्याजासारखे नियमित उत्पन्न मिळत नाही.

अमेरिका, इस्रायल आणि इराण यांच्यातील वाढत्या तणावामुळे डॉलर निर्देशांकही मजबूत झाला आहे. अशा काळात, गुंतवणुकदार सुरक्षित गुंतवणूक म्हणून डॉलरकडे अधिकाधिक वळत आहेत, ज्यामुळे सोन्याच्या किमतींवर दबाव येत आहे.