रत्नागिरी प्रतिनिधी : जगाला शांतता आणि आनंदाचा मार्ग दाखवणारे जागतिक आध्यात्मिक गुरु परमपूज्य श्री श्री रविशंकर जी यांचा ७० वा वाढदिवस आणि ‘द आर्ट ऑफ लिव्हिंग’ फाऊंडेशनच्या ४५ व्या वर्धापनदिनानिमित्त रत्नागिरीत अनोख्या पद्धतीने सेवा उत्सव साजरा करण्यात आला. आर्ट ऑफ लिव्हिंग रत्नागिरी परिवारातर्फे आयोजित भव्य रक्तदान शिबिराद्वारे सामाजिक बांधिलकी जोपासत गुरुदेवांना वाढदिवसाची अनोखी भेट देण्यात आली.
रत्नागिरीकरांचा आणि जयगडच्या तरुणांचा उत्स्फूर्त सहभाग
१३ मे रोजी रत्नागिरी येथील सिव्हिल हॉस्पिटलमधील ब्लड बँकेत हे शिबिर पार पडले. या उपक्रमाचे वैशिष्ट्य म्हणजे केवळ स्थानिक रत्नागिरीकरच नव्हे, तर चौगुले डॉकयार्ड, जयगड येथूनही तब्बल २५ जण विशेषत्वाने रक्तदानासाठी रत्नागिरीत दाखल झाले होते. या तरुणांच्या सहभागाने शिबिराचा उत्साह द्विगुणित झाला.
मान्यवरांची उपस्थिती
या शिबिराचे नियोजन आर्ट ऑफ लिव्हिंगच्या ज्येष्ठ प्रशिक्षिका ॲड.. सौ. जया उदय सामंत यांनी केले होते. यावेळी त्यांच्यासोबत आर्ट ऑफ लिव्हिंगच्या प्रशिक्षिका विनीता गोखले, भूवना महागावकर यांच्यासह सेवाकार्यात सदैव तत्पर असणारे साधक राजेश भुर्के, संजीवनी मोरे, वैभव भुर्के, सीमा पटवर्धन, प्रमोद खेडेकर, वैभव पालकर आणि सचिन पवार उपस्थित होते.
‘मानवता हाच धर्म’ – सेवाकार्याचा संदेश
“गुरुदेवांनी नेहमीच सेवा आणि प्रेमाचा संदेश दिला आहे. त्यांच्या वाढदिवसानिमित्त रक्ताची गरज असलेल्या रुग्णांना मदत व्हावी, या हेतूने हे शिबिर आयोजित करण्यात आले,” अशी भावना आयोजकांनी व्यक्त केली. सिव्हिल हॉस्पिटलच्या ब्लड बँक कर्मचाऱ्यांनी या उपक्रमाचे कौतुक केले असून, संकलित झालेले रक्त गरजू रुग्णांसाठी वरदान ठरणार आहे.
ठळक वैशिष्ट्ये:
निमित्त: श्री श्री रविशंकर जी यांचा ७० वा वाढदिवस व आर्ट ऑफ लिव्हिंगचा ४५ वा वर्धापनदिन.
स्थळ: सिव्हिल हॉस्पिटल ब्लड बँक, रत्नागिरी.
विशेष सहभाग: जयगड येथील चौगुले डॉकयार्डमधून २५ रक्तदात्यांची उपस्थिती.
आयोजन: आर्ट ऑफ लिव्हिंग रत्नागिरी परिवार.
